Radiodokumentaren:

Roger - Very Important Criminal

Frå avdeling B3 i Oslo fengsel til eit A4-liv i det fri

Radiodokumentar av Lars-Helge Myklebust
Teknisk regi: Geir Hauger
Konsulent: Berit Hedemann

Laurdag 13.oktober kl.10.03 og søndag 14.oktober kl.21.03

Skal Roger klare overgangen til eit liv utan kriminalitet og rus?
Roger er gjengangar – vanekriminell. Han har 15 dommar bak seg - mest for biltjueri. Han har fleier hundre bilar på samvitet. Men han er også straffa for bruk av narkotika, tjueri og vald mot offentleg tenestemann. Roger er blitt 42 år og er lei av å vandre inn og ut av fengselet. No har han fått nok. No vil han over i eit rusfritt og lovlydig liv med fast jobb. Vil han klare det?

For å mestre overgangen til eit lovlydig liv har Roger skaffa seg mange gode hjelparar. Kvalifiseringssenteret på StHanshaugen hjelper han med å eit arbeidstreningsprogram når han kjem ut, kommunen har skaffa han ei leiligheit og Sosialtenesta betaler husleiga og straumrekningane. Og han har kontakt med Wayback, ein organisasjon av tidlegare kriminelle rusmibrukarar. Robert frå Wayback er fadder og møter Roger kvar tirsdag i fengselet, og skal prøve å hjelpe Roger gjennom den vanskelege overgangen til eit ”normalt” liv.  Robert har sjølv 11 dommar bak seg og har rusa seg mesteparten av livet. I dag er han ”nykter” og ”straight ”, har skaffa seg sosionomutdanning og skulle ha gode forutsetnader for å hjelpe Roger.

Roger har alle odds mot seg: 8 av 10 som slepp ut frå norske fengsel hamnar bak murane igjen. Og jo lengre du har vore kriminell jo verre er det. Det å begynne på eit nytt liv etter å ha vore kriminelle i mange år betyr at du må skaffe deg nye vennar, eit nytt nettverk og at du må gå på jobb kvar dag. Det betyr at du må venne deg til ein ny livsstil og eit nytt tenkesett. Og det er sanneleg ikkje lett å kvitte seg med det livet du kan og gå ”tilbake til start”. 

Roger står dessutan på Oslopolitiets VIC-liste. På denne lista står det 83 gjengangarar som blir følgt ekstra nøye for å hindre at dei skal drive med kontinuerleg kriminalitet. Etter 2 års prøvetid er Oslopolitiet no i ferd med å innlemme enno fleire Very Important Criminals på lista. Alle på denne lista blir varetektsfengsla så snart dei begår ei ny kriminell handling og køyrt raskt gjennom rettsystemet. Det betyr at Roger ikkje kan foreta seg eit einaste ulovleg sprell før han sit bak murane igjen.

I vår sat Roger på avdeling B3 i Oslo Fengsel og venta på å få sleppe ut til sommaren.18. juni stod han på gata igjen som ein fri mann. Korleis vil han klare seg? Det får du vite i Radiodokumentaren ”Roger Very Important Criminal” på P2 laurdag 13.oktober kl.10.03 og søndag 14.oktober kl.21.03.